Gor Mahia nyakwar Ogallo ne en ratego ma aa ka luo. Jonyuolne nochake ni Obunga, mane en nying kwerene. Ne en wuod Ogada Jakanyamua gi Atoka Nyokada, nyar Kanyada.
Ne onyuole kaluo e dho wath mar nam Lolwe.. Nodongo kaka nyithindo mamoko kachiel ginyithindgi.
Ogada ne en ja doho to kata kamano, Gor enyathi mawuoyi kende mane oyudo.
Ng’eyo ka Gor ne en juogi koso dhano ne gima tek ainya .Ne wachore ni ne en kod teko mang’eny miwuoro. Roteke newacho ni teko ne noakuom kwargi ma Ogallo.
Min Gor ne otho kapod notin. Chieng’ moro achiel, kwargi ma Ogallo ne oluongo nyithi Ogada te mondo ogwedh gi .Ndalo go Gor ne en jahiga abich kende.Dhiang’ ma nyarwath ne oyang’. Bang’e Ogallo ne ochako ng’ado ring’o ka ogwedho godo nyithindo. Saa mar gwedho Gor kanochopo, Ogallo ne oloko yoo mar gweth. Ne ok ogwedhe gi ring’o kaka nyithindo mamoko. Ne okawo buru mar min Gor mane osetho , omiye mondo odhi oiki e od min gi.
Mae emane obedo chakruok mar teko malich miwuoro mane Gor nitiere godo. Kata kwargi ma Ogallo ne obwok. Nikech kwargi notieko kode kendo gweth ne notimore eyo mopogre, Ogallo ne omiye nying mar Mahia.
Kane odongo, Gor ne oyudo teko malich miwuoro kaka teko mag koro. Gimoro amora mane okoro neyangore alanga. Ne gin gik ma chalo kaka nyithindo mane oneno ka onindo. Bang’ koro no, Gor nodhi Karungu ma ne okwero jolweny mondo kik rakre kod lee mangeny machalo gi nyithindo mane oneno. Kata ka jolweny nong’ere ainya kaka joloch ewi wasikgi ndalo duto, notamogi rakruok gi lee go. Nong’eyo ni ne idhi logi nikech lee go ne nigi kete magolo mach edend gi.
Ma en mana achiel kuom tekre ma Gor ne nitiere godo. Koro ge ne ng’eny to ne ok nyal chung gi kod ng’ato ang’ata mana kaka odede ok nyal chungi.
Nikech tekre malich miwuoro,dakteche mathietho kod yien pod dhi kamane oike mondo giyud teko mag juok. Kata kamano ikwero ji mondo kik okaw it yien, kata mana kite mantiere e aluora mar liend Gor ka ok gi kwayo anyuola ner mapod nitiere.
Riwruok moro amora kod liend Gor iwacho ni chando juoke, kendo jogo ma oriwre kode wachore ni bedo ga matuo kendo moko nyalo kata tho.
Kawuono, Joluo paro Gor Mahia ma nyakwar Ogallo kokalo e tim mar adhula marauma miwuoro e Kenya mangima ma iluongo gi dho ngere ni GOR MAHIA FOOTBALL CLUB. Nyaka kawuono Gor en achiel kuom thuondi ma idhialo kendo pod oyange piny kaluo.
Join the Lughayangu Community!
